औरंगाबादच्या कचरा कोंडीची बातमी पाहून माझ्या मनात विचार आला, फक्त औरंगाबादच नाही तर बऱ्याच ठिकाणी हा प्रश्न पुढे मागे निर्माण होऊ शकतो. याला कळत नकळत आपण सारेच जबाबदार आहोत का? तर याचे उत्तर नक्कीच हो येईल बरोबर ना. आपल्या सगळ्याना सुखी जीवन हवे असेल तर चला कचरा वर्गीकरण करून, एक पाऊल स्वच्छतेकडे टाकू आणि स्वच्छ औरंगाबाद करूयात.
आपण सगळे कमीतकमी कष्ट करून जास्तीत जास्त सुखात राहायचा प्रयत्न करतोय. वापरा आणि फेका ही प्रवृत्ती आपल्या सगळ्यामध्ये निर्माण होत चालली आहे. त्याकडे किमान आता तरी गंभीर प्रश्न म्हणून पाहिले पाहिजे.
युज अँड थ्रो- प्लास्टिक कचरा
आपल्या घरात छोटासा कार्यक्रम असला की आपण लगेच यूज अँड थ्रो चे ग्लास, चमचे, द्रोण, प्लेट आणतो , वापरतो आणि देतो. घरात शोकेस मध्ये मारे ऐटीत ग्लास, डिनर सेट ठेवलेले असतात, पण ते वापरले तर परत धुणार कोण? म्हणून आपण ते फक्त शोकेसची शोभा वाढवण्यासाठीच ठेवतो, धुवायला वेळ कोणाला आहे? सांगा बरं.बिस्लरी बाटल्या
पूर्वी गावाला जाताना आपण मोठ्या वॉटर बॅग्ज न्यायचो.पण आता ठिकठिकाणी बिस्लरीच्या बाटल्या घेतो, दिसेल त्या जागी वापरून फेकून देतो.नॅपकिन्स
लहान मुलांचे लंगोट हा प्रकार तर आपण विसरूनच गेलोय. हगीज,सॅनिटरी नॅपकिन्स ! सरासपणे वापले जाते. हात पुसायला रुमाल ऐवजी पेपर नॅपकिन्स! बापरे! वापरा आणि फेका असा किती कचरा टाकतो आपण !पॉलिथीन पिशव्या
पूर्वी वाण सामान आणताना घरातूनच तेलाची बरणी, तुपासाठी डबा न्यावा लागायचा. आता यासाठी विविध प्रकारच्या पॉलिथीन पिशव्या किंवा बाटल्या मिळतात, नंतर त्या आपण फेकून देतो.
स्वतंत्र पिशवीचा हट्ट
पूर्वी लग्नाचा कितीही मोठा बस्ता बांधला तरी तो एकाच मोठ्या कापडात गाठोडं करून मिळायचा. आता प्रत्येक साडीसाठी व कपड्यासाठी स्वतंत्र पिशवीच आपला अट्टाहास असतो.वापरा आणि फेका वृत्ती
वस्तू दुरुस्तीकडे आपला कल नसतो. बूट, चप्पल, खेळणी, छत्री अशा गोष्टी आपण लगेच फेकून नव्या घेतो. त्या वस्तूचा दुरुस्त करून पुन्हा वापर करणे ही संकल्पना आपल्याला रुचत नाही त्यामुळे अशी असंख्य उदाहरणे सांगता येतील. याला जबाबदार कोण? याचे उत्तर म्हणजे सध्याचे धावते युग म्हणावे लागेल. कोणालाही विचार करायला वेळ नाही. रात्र थोडी सोंगे फार. प्रत्येक जण आपापल्या कोशात आणि व्यापात इतका अडकलाय की त्याला स्वतःच्या आयुष्याची कोंडी फोडायला वेळ नाही तर कचरा कोंडीचं काय घेऊन बसलात ?
पार्सल
कंटाळा आला की आपण पटकन एखाद्या हॉटेलमधून जाऊन जेवण ऑर्डर करतो, पण हे पार्सल फोडल्यानंतर होणाऱ्या कचऱ्याने एक अक्खी कॅरी बॅग भरते, पण आपण मात्र वेगळ्याच आनंदात असतो.इलेक्ट्रॉनिक वस्तू
आपल्या दैनंदिन जीवनात आपण लाईट, फॅन आणि इतर अनेक वस्तूचा वापर करतो, पण ह्या वस्तू खराब झाल्या की आपण बिनधास्त कचऱ्यात टाकतो. त्या टाकताना लाईटच्या काचा फुटतात. त्यापासून इजा होऊ शकते.मित्र मैत्रिणीनो आता कचरा गोळा करताना त्याचे वर्गीकरण करा. म्हणजे ओला सुका आणि इतर वस्तू आदींचे. यामुळे आपले आणि आपल्या आप्तस्वकीयांचे भविष्य उज्ज्वल होण्यास मदत मिळेल.
प्रतीक्षा परिचारक-पाठक
औरंगाबाद
